Moynaq rayonındaǵı 5-sanlı mektepti ótken jılı aǵla bahalarǵa tamamlaǵan Gúlayım Quwanıshbaeva házirgi waqıtta Berdaq atındaǵı Qaraqalpaq mámleketlik universitetiniń jurnalistika tálim baǵdarı boyınsha bilim alıp atır. G.Quwanıshbaeva avtorlıǵında shıqqan “Meniń atım Gúlayım” hám “Jaqsılıq nur keltirer” atlı kitapları arqalı rayon xalqı onıń dóretiwshiligi menen keńnen tanıs boldı.

G.Quwanıshbaeva Universitet bosaǵasın atlawı menen onıń pikiri, bilimi hám ómirge kózqarası jáne de keńeyip atır. Talapshań hám házirgi zamannıń málimleme texnologiyasınan jaqsı paydalana bilgen Gúlayım Respublikamızdıń birneshe telegram tarmaqlarında administratorlıq xızmetin atqarıp kelmekte. Ol házirgi waqıtta “Ustaz jolı”, “Túrkiy Jazıwshılar awqamı” hám “Ibratlı sózler” kanalların basqaradı. Onıń ádebiy maqalaları respublikalıq “Qaraqalpaqstan jasları,” “Erkin Qaraqalpaqstan” hám “Jetkinshek” gazetalarında jariyalanıp kelmekte.

Sonıń menen bir qatarda jas jazıwshı Gúlayım óz dóretiwshiligi menen shıǵarmalar tańlawlarına da qatnasıp, sıylı orınlardı iyelep kelmekte. Sonnan 2023-jılı yanvar ayında Qırǵızstan Respublikasında ótkerilgen “Istedodi duraxshon” konkursına qatnasıp, arnawlı sertifikatqa iye boldı. Respublikamız kóleminde ótkerilgen “Álisher Nawayınıń 582 jıllıǵı”na baǵıshlanǵan shıǵarmalar tańlawında 1-orındı qolǵa kirgizdi. “Ustaz jolı” telegram tarmaǵında belsendi administrator bolǵanlıǵı ushın gazeta telegram tarmaǵınıń 3 jıllıǵı múnásibeti menen G.Quwanıshbaeva arnawlı diplom menen sıylıqlandı.

Usı jıldıń fevral ayında qırǵızstanlı kórkem sóz ustaları tárepinen Gúlayımnıń dóretpeleri joqarı bahalanıp, kreativ materiallar tańlawında “BRILLIANT TALANT” nominaciyasın qolǵa kirgizdi hám Qırǵızstan jazıwshılar awqamına aǵzalıqqa qabıllandı. Quwanıshbaeva Gúlayımnıń Facebook sociallıq tarmaǵında járiyalanǵan shıǵarmaları Oraylıq Amerikanıń El-Salvador mámleketinde óz oqırmanların taptı. Silvia Arguetta hám Juanna Alvarez tárepinen fevral ayında “GIVES YOU THE PRESENT DIPLOMA OF HORNOR, FOR BIENS AN AKTIVE MEMBER, IN TNE MONTH OF FEVRUARY 2023” arnawlı diplomın hám mart ayında “POETAS Y SENTIMENTOS” sertifikatın qolǵa kiritti.

Respublikalıq “Ustaz jolı” telegram tarmaǵında ótkerilgen “Álem ibrat alar hayal-qızlardan” atamasındaǵı ádebiy dóretpeler tańlawında 1-orındı iyelep arnawlı diplom menen sıylıqlandı. Usı toparda “Adminlik” wazıypasın atqarıwdaǵı múnásip xızmetleri ushın gazeta redaktorınıń diplomı menen sıylıqlandı. 2023-jılı mart ayında Túrki Álemi Jazıwshılar awqamı Prezidentiniń “Túrki tilles xalıqlarınıń ózara doslıǵın bekkemlew maqsetinde ótkizilgen Ǵumar Qarash hám Álisher Nawayı shıǵarmalarındaǵı mánawiy baylanıs” atlı Xalıqaralıq shıǵarmashılıq tańlawınıń bas bayraǵın jeńip alıp, “ALTÍN QALAM IEGERI” nominaciyasın qolǵa kirgizdi hám sonıń menen birge “Túrki taǵılımı” medaline iye boldı.

Quwanıshbaeva Gúlayımnıń shıǵarmaları Xalıqaralıq “Pegas”, “Turan birligi” jurnallarına jariyalanıp atır. Ol usı jıldıń mart ayında Qazaqstan jazıwshılar awqamınıń aǵzalıǵına qabıllandı. Quwanıshbaeva Gúlayımnıń bir qatar gúrrińleri “AVANGARD” baspasında shıǵarılǵan “Talantlılar ilhamı” toplamına kirgizildi. Aldaǵı waqıtta onıń “Saǵınısh” atlı shıǵarmalar jıynaǵı “Bilim” baspasında jarıq kóriw aldında tur.

Derek: KARSU.uz