Нукус давлат техника университетида “Яшил иқтисодиёт ва экологик барқарорликни таъминлашда сунъий интеллектнинг роли” мавзусидаги республика илмий-амалий анжуманнинг ёпилиш маросими бўлиб ўтди.

2025-йил 28-ноябрь куни Нукус давлат техника университетида мазкур илмий-амалий анжуманнинг якуний қисми ўтказилди. Тадбирни Илмий ишлар ва инновациялар бўйича проректор M.Артиқбаев олиб борди ва анжуман давомида илгари сурилган илмий ғоялар, таклиф ва муҳокамаларнинг нафақат олий таълим тизими, балки экологик барқарорлик ҳамда инновацион ёндашувларни ривожлантиришда муҳим аҳамият касб этишини таъкидлади.

Ёпилиш маросимида анжуман шобалари раисларига сўз берилиб, улар ўз йўналишлари бўйича олиб борилган муҳокамалар, тақдим этилган маърузалар ҳамда эришилган натижалар юзасидан қисқа ҳисоботлар беришди. Ҳар бир шўба доирасида ёш тадқиқотчилар, профессор-ўқитувчилар ҳамда соҳага оид мутахассислар томонидан долзарб мавзуларда фикр алмашилди.

Шунингдек, тадбир ташкилотчиларига анжуманни юқори савияда ташкил етишдаги фаолияти учун сертификат ва ташаккурномалар топширилди. Яъни «Компьютер илмлари» факультети Дастурий инжиниринг мутахассислиги 1-босқич магистранти Авилханова Балауса “Табиий тилни таҳлил қилиш моделлари ва алгоритмлари таҳлили” номали маърузаси учун сертификат билан тақдирланган бўлса, шу факультетнинг 1-босқич магистранти болалигидан II гуруҳ ногирони Саламат Авезов фаол иштироки учун ташаккурнома билан тақдирланди.

Мазкур анжуман экологик барқарорлик ва «яшил» ривожланиш стратегияларини амалга оширишда сунъий интеллектнинг имкониятларини кенг ёритиб бериши билан аҳамиятли бўлди ҳамда келгусида илмий ҳамкорликни кучайтириш учун мустаҳкам замин яратди.

Саламат Авезов,
Нукус давлат техника университети магистранти