Hár jılı mámleketimizde 1-iyun «Xalıqaralıq balalardı qorǵaw kúni» bayramı keń túrde belgilenedi.

Qaraqalpaqstan Respublikası Ádillik  ministrligi, Mayıplar jámiyeti hám Vatanparvar shólkemi menen birge «Biz birgemiz» akciyası sheńberinde imkaniyatı sheklengen balalar ushın «Baxıtlı balalıq nızam qorǵawında» atamasında bayram ilajı shólkemlestirildi.

Bunda respublikamızdıń barlıq rayonları hám Nókis qalasınan balalar qatnastı.

Bayram ilajın ádillik ministri S. Mambetkadırov ashıp berdi hám barlıq balajanlarımızdı bayram menen qutlıqladı. Elimizde bala huqıqların qorǵaw boyınsha nızamshılıq hújjetleri hám olardı ámelge asırıw boyınsha islenip atırǵan jumıslarǵa toqtaldı.

Mámleketimizde bala huqıqların qorǵawǵa qaratılǵan bir qatar nızamshılıq hújjetleri qabıl etilgen. 

«Bala huqıqlarınıń kepillikleri haqqında»ǵı Ózbekstan Respublikası Nızamına muwapıq bala  degende on segiz jasqa tolǵanǵa (er jetkenge) shekemgi bolǵan shaxslar túsiniledi.

Usı Nızamǵa tiykar balalar:

– jasaw huqıqına;

– tuwılǵan waqtınan baslap familiya, at, ákesiniń atın alıw, millet hám puqaralıqqa iye bolıw huqıqına, sonday-aq olardı saqlap qalıwǵa;

– erkinlik, jeke qol qatılmaslıq, turaq jay qol qatılmaslıq hám xat-xabarlarıńızdıń sır saqlanıwına;

– shańaraqta jasaw hám tárbiyalanıw, óz ata-anasın biliw, olar menen birge jasaw hám olardıń ǵamxorlıǵınan paydalanıw;

– shańaraǵıńızda óz pikirin bildiriwge;

– oylaw, sóylew, hújdan hám isenim erkinligi; 

– turaq jaylı bolıw;

– miynet etiw;

– óziniń jası, densawlıǵı hám mútájliklerine sáykes keletuǵın dem alıw hám bos waqıtqa;

– den-sawlıǵın saqlaw hám bilim alıw huqıqlarına iye.

Ilaj dawamında balalar «Meniń huqıqım» atamasında súwret saldı, mádeniyat xızmetkerleri tárepinen tayarlanǵan koncert baǵdarlamasın tamashaladı.


Derek: Ádillik jańalıqları