Усы жылдыӊ 8-Декабрь күни Өзбекистан Арнаўлы Олимпиадасы спорт жәмийетлик бирлеспеси Қарақалпақстан бөлимимиз майыплығы болған шахслардыӊ мәдений саўатханлығын арттырыў мақсетинде И.В.Савицкий атындағы Қарақалпақстан Республикасы Мәмлекетлик көркем өнер музейинде экскурсия ҳәм балалар ушын кеше шөлкемлестирди.
Кеше даўамында киши ҳәм үлкен жастағы майыплығы болған шахслар сүўрет соғыў ҳәм пластелиннен түрли фигураларды жасаў арқалы кеўиллерин көтерди. Буннан кейин музей хызметкерлери менен биргеликте әййемги ҳәм тарийхый экспонатларды, көркем сүўретлерди тамаша қылды.
Кешени шөлкемлестириўде қәўендерлер «Отабек – Кумуш» ЖШЖ ҳәм И.В.Савицкий атындағы Қарақалпақстан Республикасы Мәмлекетлик көркем өнер музейи, Өзбекистан Майыплар Ассоцияциясы Қарақалпақстан бөлими ҳәм бир топар Волонтёрлар жақыннан жәрдем берди.
Еслетип өтемиз И.В.Савицкий атындағы музей «Рус Авангард» жаныры бойынша дүньяда екинши орында туратуғын болып, бүгинги күнде музейдиӊ 90 мыӊнан аслам коллекциясы бар. Музей үш блоктан ибарат болып ҳәр бир блок майыплығы болған шахслар ушын толық масластырылған. Кириў бөлегинде талап дәрежесиндеги пандуслар, жоқары этажларға көтерилиў ушын лифтлер, майыплар ушын арнаўлы ҳәжетханалар ҳәм майыплар арбашалары бар.
Дерек: Өзбекистан Майыплар Ассоцияциясы
Қарақалпақстан бөлими
