Ózbekstan Respublikası ádillik ministri R.Davletovtıń Qaraqalpaqstan Respublikasına xızmet saparı sheńberinde “Doslıq úyi”nde Qaraqalpaqstandaǵı mámleketlik emes kommerciyalıq emes shólkemleri belsendileri menen ushırasıw shólkemlestirildi.
Ushırasıwdı shólkemlestiriwden tiykarǵı maqset, mámleketlik emes kommerciyalıq emes shólkemleri tárepinen ámelge asırılıp atırǵan jumıslar, olardıń jumıslarında payda bolıp atırǵan mashqalalar hám puqaralıq jámiyetin rawajlandırıw, jámiyetlik sheriklik máseleleri boyınsha pikir-usınısları menen tanısıwdan ibarat.
Ashıq sáwbetlesiw formasında ótkerilgen ushırasıwda hayal-qızlarǵa qarata zorlıq, sonıń ishinde shańaraqlıq zorlıqtı keltirip shıǵarıp atırǵan tiykarǵı faktorlar hám olardı saplastırıwdaǵı áhmiyetli máseleler, ónermentshilik penen shuǵıllanıwshı mayıplıǵı bolǵan shaxslardı qollap-quwatlaw, mámleketlik emes kommerciyalıq emes shólkemleri ushın járiyalanǵan grant qarjıları, jámiyetlik sheriklik hám jámiyetlik qadaǵalawdıń subekti sıpatında mámleketlik uyımlar menen birge islesiw sıyaqlı máseleler boyınsha pikir-usınıslar bildirildi.
Maǵlıwmat ushın, búgingi kúnde Qaraqalpaqstan Respublikasında 610 mámleketlik emes kommerciyalıq emes shólkemler iskerlik kórsetpekte.
Usı tarawdı mámleket tárepinen qollap-quwatlaw maqsetinde 2021-jıldıń 30-dekabr kúni Nókis qalasında “Doslıq úyi” paydalanıwǵa tapsırılıp, bul jerge 45 mámleketlik emes kommerciyalıq emes shólkemler jaylastırılıp, óz iskerligin alıp barmaqta.
Ushırasıwda qatnasıwshılar tárepinen “Doslıq úyi”nde barlıq imkaniyatlar jaratılıp berilgenligi, biraq házirgi kúnde materiallıq-texnikalıq máselelerge mútájligi barlıǵı haqqında bildirilgen pikirler ádillik ministri tárepinen ayrıqsha qadaǵalawǵa alındı.
Derek: Òzbekstan Respublikası mayıplar assosiasiyası
Qaraqalpaqstan Respublikası aymaqlıq bòlimi
