Assalawma aleykum, anajanım, bul òmirde siziń bar ekenligińiz men ushın baxıt. Magan sizdey mehri dàrya ananı jetkizgenine shúkur etemen. Meniń mehriban ata-anam bar. Solardıń mehri, miyneti, umit beriwi arqasında òzime múnàsip orın taptım.

Atam-anam mennen nalımadı, shúkur qıldı. Atam meni shıpakerlerge alıp barıp, ayaģımnan júre alatuģın dàrejege jetkerdi.

Atam meni mektepke arqalap alıp barar edi. Oqıw men ushın úlken quwanısh – jańa àlemniń ashılıwı edi, sonıń menen birge azaplı da edi. Bilim alģanıma quwansam, òz teńleslerim menen juwırıp oynay almaģanıma òkiner edim. Anamnıń mehri, zeyinli tàrbiyası nàtiyjesinde oqıwımdı òzlestirdim. Ustazım da adamgershilikli insan edi, maģan jazba juwap beriwge múmkinshilik berdi.

Anajanım bergen kitap maģan quwanısh àkeldi. Onı oqıp men basqa àlemge kirip qalģanday sezindim. Àjapam menen meni izlep kelgen kúnińiz òmirimdegi eń quwanıshlı  kúnim edi.  Siz men oylaģannan da qarapayım, júzińizden nur jawıp turģan hayalsiz.

Meniń sóylegen sózlerimdi ıqlas penen tıńladıńız. Kewilimdegilerdiń bárin tógip salǵım keldi, biraq tilim menen tolıq jetkize almayman.

Bári bir siziń mehirli kózlerińiz meni túsinip, aqırına shekem erinbey tıńladıńız. Ata-anam hám ustazlarımnıń bergen tálim tárbiyası, qala berdi, alǵa umtılısım arqasında eki joqarı oqıw ornın pitkerdim.

Men Ózbekstan Mayıplar Associaciyası Qaraqalpaqstan Respublikası aymaqlıq bóliminde mayıplar huqıqın qorǵaw boyınsha eki veb-sayt ashqanman. Doslarım kóp, úyde internette isleymen.

Ákem hár dayım meniń qasımda. Men hesh qashan túshknlikke túspeymen. Jasaw ushın gúresemen. Meniń baxıtıma, perzentlerińiz baxıtına da aman bolıń, Anajan. Sizdi jaqsı kórip ardaqlawshı balańız Salamat Avezov.

Zulayho Yuldasheva,
Qońırat rayonı.


Derek: “QARAQALPAQ UNIVERSITETI”
№5 (565) Mart, 2025-jıl www.karsu.uz