Наўрыз – Шығыс халқында ислам дини пайда болыўынан алдын да белгиленип келинетуғын байрамы өз мазмунын сақлаған ҳалда ғәрезсизлик идеясы менен байытылып, үрп-әдетлеримиз, салт-дәстүрлеримиз, татыўлық, халықлар дослығы, меҳир-муҳаббат мәдений-ағартыўшылық руўхта өткерилмекте.

Усындай илажлардың бири Нөкис қаласы №35 санлы «Наўрыз» мәҳәлле пуқаралар жыйыны Ибн-Сино көшесинде «Қәдириятларың мәңги болсын, Наўрыз!» сүрени астында көшемиз турғынлары муқадес үрп-әдет дәстүрлеримизди өзинде жәмлеген, тынышлық, татыўлық ҳәм пәраўанлық әййямы болып өтти.

Илажды №35 санлы «Наўрыз» мәҳәлле пуқаралар жыйыны баслығы А.Жанибекова, көше бийи ҳәм нураныйлар бәрше турғынларды ҳәм жас әўладларды Наўрыз әййямы менен қутлықлады.

Жаңаланыў мәўсиминиң кирип келиўи инсан руўхыятын ҳәм қәлбин толқынландырып, Наўрыз ҳәм бәҳәр тымсалы болған тағам сүмелек, миллий тағамлар таярланып, көшениң белсенди пуқаралары үстине миллий кийимлерини кийген ҳалда таярланған концерт бағдарламасы хәм кеўил ашар миллий сахналық көринислер қойып берилди.

– Инсаныйлық, мийрим-шәпәәт, мириўбет тымсалы көшемиздиң ҳәр бир пуқаралардың қәлбинде сақланған қәдириятларды жасы үлкен нураныйларымыз ҳәм майыплығы болған шахсларымыздың миннетдаршылық сезимлери жүзлеринде сәўлеленди, – дейди Нөкис қалалық депутаты А.Аймуратов.

Байрам кейпиятын бөлисип, тынышлық, шүкиршилик, аўызбиршилик руўхы ҳәм философиясы сиңген бул байрам пуқаралардың қәлбинде қәдирият ҳәм дәстүрлеримизге ҳүрмет, елимизде болып атырған өзгерислерге байланыслылық сезимин усынды.

Саламат АВЕЗОВ,
Нөкис қаласы.